QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen «Arýaq» fılmi 71-shi Kann kınofestıvalinde ashylǵan Qazaqstannyń ulttyq pavılonynda tanystyryldy jáne halyqaralyq kınofestıvalderdiń irikteýshileri men dıstrıbýtorlarynyń qyzyǵýshylyǵyn týdyrdy.

- Men pavılonǵa qoıylǵan qazaqstandyq kınotýyndylardan erekshe áser aldym. Ásirese qarıa men jetim bala týraly baıandaıtyn «Arýaq» fılmin atap ótkim keledi. Qazir biz qazaq áriptesterimizben atalmysh fılmniń Italıadaǵy dıstrıbýtsıasy jóninde kelissózder júrgizip jatyrmyz, - dedi ıtalıalyq kınoprodúser Flavıo Donını.

Rejıser Qýat Ahmetovtyń «Arýaq» fılmi taǵdyrdyń jazýmen ushyrasqan qart Aǵataı men jetim bala týraly baıandaıdy.

-    Ideıa avtory Asanáli Áshimov. Ol 2014 jyly maǵan elden shalǵaı turatyn jalǵyz basty qart týraly fılm túsirýdi usyndy. Asanáli aǵanyń oıy boıynsha qarıa – dala fılosofy, túrli ǵylymǵa qyzyǵatyn adam,  - dedi fılmniń rejıseri Qýat Ahmetov.

Fılm byltyr óndiriske jiberilip, bıyl kóktemde aıaqtalǵan bolatyn. Túsirilimder Almaty oblysynda, İle ózeni jaǵalaýynda ótken. Fılmniń senarıin túrki elderiniń ertegileri men ańyz-áńgimeleri jelisi boıynsha Qýat Ahmetov pen Odılsha Agıshev jazyp shyqqan.

QR Mádenıet jáne sport mınıstrliginiń qoldaýymen osymen ekinshi ret ashylyp otyrǵan Kann kınofestıvalindegi Qazaqstannyń ulttyq pavılony otandyq fılmderdi nasıhattaýǵa ońtaıly alań bolyp tabylady.

Bıyl pavılondaǵy tanystyrylymda «Qazaqfılm» kınostýdıasy túsirgen Djeff Vespanyń «Ámire», Bolat Qalymbetovtyń «Talan» jáne basqa da jobalary prezentasıalanǵan.

«Arýaq» fılmi jaıly: Aǵataı esimdi qarttyń eshkimi joq. Súıgen jary qaıtys bolǵan. Aralarynda balalary bolmaǵan. Aǵaıyn-týysqandary da qalmaǵan. Fılmge óz ortasynan bezip, dalaǵa baryp turýdy kózdegen qart kisiniń ómiri arqaý bolǵan. Áıtse de danagóı, pálsapashynyń jolynda balalar úıinen qashyp shyqqan Bóbek degen kishkentaı, elgezek bala kezigip, onyń bastapqy josparyn buzyp ketedi.